.jpg)
صوت الممرضِّة وهي تحكي للدكتور،، نفسُه بروح،، "إحنا بنفقده،، إحنا فقدناه،،" / بقلم.. هبه رافع محمد خليل صرصور
.JPG)
ومثل ما شهِد الزيتون لبلاده رح يشهد لدمِّي الي غطَّاني وكفَّني،،
كنت بشعُر بكلشي،
سمعِت آختي بتبكي، كانت تنادي بإسمي،،
كنت آحاول آرد عليها بس دقات قلبي كانو بخنقوني والدم يطلع مثل الهوا من ثمِّي،،
كنت بشعُر بكلشي،
حتى بآول رصاصِة بتحضن صِدري،
وكيف حاولو يطلعوها،،
صوت الممرضِّة وهي تحكي للدكتور،،
نفسُه بروح،،
"إحنا بنفقده،،
إحنا فقدناه،،"
بس أنا وقف قلبي من لما دخلو هالرصاصات دنيتي،
بس مكنش حدا يشعر،،
كنت بشعُر بكل إشي،،
تركِت هالجسِم ورحِت أدوِّر بين الكُل،
عن أمي وابوي،،وخطيبتي،،وأصحابي،،،
شُفت أبوي لما حكولو إني مُتت،
شُفت الغصَّة الي بقلبو،،
شفِت كيف حشر دموعو قدَّام إمي،
وتركهِن ينزلو لمَّا سمِع إمي بتبكي،،
كنت بَشعُر بكلشي،،
شُفِت صاحبي كيف هَد يرمح ويصيح وينادي بإسمي،،
شُفت صاحبي كيف صار يبكي ودموعو ما وقفَت،،
من بين الكُل، خُفت على الي رح تكون إم ولادي،
كُنت حاكي لأبوي إني كم شهر ورح ودِّع العزوبية، كُنت ليلتها رح فاجِئها بالتاريخ،،
كُنت بشعُر بكلشي،،
كيف فتحت بيليفونها،وسمعَت،
"البقية بحياتِك،،"
كنت شايف كلشي، آنا ما مُتِت، آنا بعدني عايش، بعدني شايف، بعدني بشعُر،،
شُفتها كيف وِقعت عالآرض وما بدها تفتَح عيونها،،
حسيت في الوجع الي جواتها،،
كُنت اسمعها،
"لا،بتكذبوا علي، قبل شوي حاكيتو وهو بخير،،"
كنت أشعُر بكلشي،،
كيف خيطو جروحي وبعدهن الرصاصات معلَّقات بقلبي،،
كيف آخذوني للمشرحة وصارو يدورو كيف مُتت،
بس ما بهمني كيف،
بدي اعرِف ليش؟ ليش آنا؟ ليش ثلث رصاصات خرقَت جسمي وحرقت قلب امي وما جفَّت دموع خطيبتي ووقفت دقات ابي،
ليش؟ حدا يقولي انا شو ساويت؟ انا مين آذيت؟ ليش انا ؟ ليش!،،
كنت بشعر بكلشي،،
آخذوني للبيت،
ويا رضاكِ يا إمي ما آدفى حضنِك،،
حضنتني امي وعيونها مَشيولة من مكانها،
حكت كثير امي بجواتها وجوات ذاني،،
كنت سامعِك يا إمي،،
كنت سامعِك لما حكتيلي (يا إبني ،يا قطعة عمري وكل دنيتي، يا حبيبي يا إمي، يا أبو عيون زرقا وقلب ابيض، ربَّك ما بينساك، ربَّك كبير يا إمي، كبير كثير، يا إمي يا غالي دوِّر على اخوك واحكيلو انك جيت مشانو، إحكيلو انكم رح تستنوني ، بالجنة يا إمي بالجنِّة،،)،،
كنت سامعِك يا إمي، بس دموع الي حدِّك شقَّت قلبي أقوى من الرصاص الي فات لصدري،،
كانت تصرِّخ بإسمي،،،
كنت لساتني لابس الخاتم الي عانق إيدها،،
كانت تحكي ليش هيك،
ليش رُحت وتركتني،،
كنت سامعِك ولساتني سامعِك يحبيبة قلبي،
فوَّتوني لجوا ، لجوَّا بيتي الي كنت رح اتزوَّج في، كنت رح اتزوَّج بشي يوم،، كُنِت،،
دخَل ابوي علَيِّ،،
صار يحمم فيِّه،
كان يلمِس صدري محل الرصاص ويبكي،،،
وقديش دموعك غالية يا بيِّ،،
كنت آصرِّخ انا موجود،،
انا موجود،،
بس ما كان حدا يسمعني،،
كنت اشوف الكل وما في حدا بشوفني،،
كُنت بشعر بكلشي،،
كنت سامعَك يا بَيِّ وانتَ تحكيلي،،
"يا مدَلَّل بكفي دلال، يلا قوم، قوم خلَّينا نركِّب خزاينك ونحط جواريرَك ونزرع وردات حد بيتَك،،
قوم يا إبني قوم،، "
كُنت بشعر بكلشي،،
حتى بدموعك يا بيِّ لما نزلَت وحضنت جفوني،،
كنت شايفك لما تحاول اتسكِّر عيوني بس يرُدُّو يفتحو لأنها ما شبعت منَّك،،
لبسوني أبيض وكفَّنوني،
لفُّوني بِغطا وحطوني بقلب النَّعِش،،
ما بفهم يا إمي،،
ليش إسمو نعش والميت بنحط فيه،،
آسئلة كثيرة يا عالم حدا يحكيلي،،
ليش؟
ليش،،
ليش،،
كُنت بشعُر بكلشي ،
كنت بشعر بدموعك يا صاحبي وكيف ما رضيت تحمل النعش لأنك كنت تصرِّخ ما بدَّك تودعني، ما بدك آروح واتركك،،
كنت شايف كلشي،،
كنت شايف كل الناس الي سكَّرت الطُرُق،،
كنت سامع خواتي وهني يبكين،،
كنت شايف كثير ناس ما بعرِفهم،
او يمكن قابلتهم لمرَّة وحدِة،،
بس،
في إشي من جواي ما عاد يتحرَّك،،
لما شفُتِك يا إمي وإنت فاتحة ثمِّك ومش مصدقة اني فوق الاكتاف محمول،،
لما شفتِك يا إم ولادي بتركضي ورا النَّعِش وبين الكل، بتصرخي "رجعولي اياه،،"
وكيف سقطتي على الارض وعيونك لفوق زي كآنك عم تشوفيني من بين هالسماوات،،
كُنت بشعُر بكلشي،،
كُنت بشعُر كيف إبعدو الغطا عني وكيف باس جبيني كل واحد بعرفني ،
كيف سكرو على وجهي،
كيف حملوني،،
وحطو التراب علي يا امي،
كُنت بشعُر بكلشي،،
كنت بسمع همسات الفاتحة من كل ثم قاعد قريب وبعيد عني،
كنت سامع وبشوف كلشي،،
حتى همسات قلبك يا امي وانتِ بالبيت،،
كنِت بشعر بكلشي،
كنت بتذكَّر بكلشي بتتذكري يا حبيبة قلبي،،
كنت بشعُر بكلشي،
حتى لما راحو كل الناس وبقي صاحبي حد قبري لثاني يوم،،
كنت بشعُر بكلشي،
كنت بشعُر بكلشي،،
حتى بالرصاصات الي بعدها معلقة بصدري،،
ودموع إمي،،
وحنينِ وجع قلب خطيبتي،،
واشلاء قلب بيِّ،،
وصدمِة صاحبي،،
كُنت بشعُر بكلشي،،
كنت آعرِف بكلشي،
بكلشي ما عدا إشي واحد،،
شو ذنبي؟،،
هبه رافع محمد خليل صرصور/٢٧.١.٢٠١٥
لارسال مواد واخبار لموقع قسماوي نت البريد: info@kasmawi.net
1
اخخخخخخ يا الله ما احلی هالكلمات
ما اجمل هالقصيده
وجعتلي قلبي كثير ونزلتلي دموعي وحسيت بقبضه قلبي
اخخخخ لو كان بايدي اساعدك بروحي انكان مقصرتش
مسلمه - 28/01/2015
2
بارك الله فيكي هبه والله قشعر بدني ودمعتي نزلت..كلماتك بتوصل القلب كل الاحترام
حبيبه - 28/01/2015
3
الله يرحموا ويصبر اهلوا !!! وكل الاحترام لهبه صرصور الي قدرت توصل اآلم وحزن عيلتوا وجسدت روحوا الطيبه
نسرين عيسى - 28/01/2015
4
كل الاحترااااااااام هبةةةةةةة :'( صعبةةةةةة وموثرةةةة جداً جداً والله يرحمك يا نجم كفر قاسم
sarsour - 28/01/2015
5
الله يرحمك يا صهيب ويجعل مثواك الجنة, يعطيكي الف عافية هبه ابدعتييييي:)))
زينب - 28/01/2015
6
ممتاز، الله يوفقك
فايز - 28/01/2015
7
الله يرحمك يا اغلى الشباب
الله يرحمك صهيب - 28/01/2015
8
كل الاحترام والله اللي كاتبتي دخل القلب الله يجازيك خير ويرحمك يا حبيبي يبن عمي
ابو خالتو - 28/01/2015
9
كلام راقي جداً
الله يسعدك ويكثر من امثالك ويرحم الفقيد ويصبر اهله..
بنت البلد - 28/01/2015
10
ولااااو قدييش بتوجججع وكلمات من لقلب:((.. الله يتغمده برحمته ياااااا رب ويجعل مثواااااه الفردوس الأعلى والله يصبر أهله وأمه وكل قرااايبه..... رحمة الله عليك يا ضحية القتل الهمجي ..
فلسطيني - 28/01/2015
11
الله يرحمة ويجعل مثواه الجنة ويصبر اهله
ام كرومه - 28/01/2015
12
عنجد انك مبدعه الله يصبر اهلو وكل محبينو ياااا رب
الله يرحمو برحمتو
وحده - 28/01/2015
13
كلمات وصلت القلب !!،معبره وواقعيه كثير...الله يرحمه ويصبر الجميع عفراقه
عزايزه - 28/01/2015
14
الله يرحمو ويجعل مئوى الجنه ان لله وان اليه راجعون الله يحماكي يا بنت خالتي ويوفقك يا رب كل مقالي بتكتبيها احلى من التانيه يا عسل
صرصور حليمه - 28/01/2015
15
قصيده رائعه ومعبره بارك الله فيكي
بنت - 28/01/2015
16
كلمات مؤثرة جدا وعميقة تدخل الى القلب , وادعو الله ان يكون في عون اهله وان يصبرهم. رحمة الله عليه
بنت البلد - 28/01/2015
17
لا حوله ولا قوه الا بالله الله يرحمو ويصبر اهله المقوله بتاثر وبتبكي الله علي الظالم حسبي الله ونعم الوكيل
صرصور حليمه - 28/01/2015
18
رائعه يا هبه .كل الاحترام،كلمات مؤثره جدا وتسرد واقع اهل الفقيد والبلد كلها .بارك الله فيكي ايتها الكاتبه الصغيره
مربية صفك :سونيا عيسى - 28/01/2015
19
ברויה - 28/01/2015
20
بارك الله فيكي يا هبة يامبدعه الله يحميكي ويوفقك ربنا انشاء الله يا زهرة كفر قاسم
ايات الجلاد - 28/01/2015
21
كل الاحترام للمبدعه هبه،بارك الله فيكي .
فعلا كلمات معبره جدا.
كل كفر قاسم عائله واحده، حزينه وتتالم لفقدان الشاب اخينا،صديقنا،وابننا صهيب رحمه الله وادخله فسيح جناته.
كلنا نتالم جدا وندعو لاهله ان يلهمهم الله الصبر ان شاء الله.
محمد اسعيد صرصور - 28/01/2015
22
الله يرحموا ويجعل مثواه الجنة كتابتك حلوة كثير ومؤثره
بالتوفيق
هلا - 28/01/2015
23
كل الاحترام وبارك الله فيك وفي والديك بالنجاح
صديقة - 28/01/2015
24
هبة ..
عنجد انتي مبدعة ، خلتيني اعيش واتخيل كل كلمة كتبتيها ، احساسك بوصل للقارء بكل سهولة ، اسلوبك سهل .. كلماتك بتوجع !!!!!!! الله يعين خطيبتو على هيك مصيبة !!! مااااااااا اصعبهااااا ،، !!! وإمه يااا رب تعين امه !!!!!!!! هبه انتي مبدعه
اسماء - كفربرا - 28/01/2015
25
الله يرحمو مؤثر جدا
سكت الكلام الله يحماكي يا بنتي
ام مقداد - 28/01/2015
26
كلماتك رائعه يا هبه ومعبره جداً تدخل القلب والى الامام ورحمة الله عليك يا صهيب وان لله وانا اليه راجعون الله يصبر اهلو علا فقدانك .
رائعه - 28/01/2015
27
عنجد انك مبدعه الله يصبر اهلو وكل محبينو ياااا رب
الله يرحمو برحمتو
وحده - 28/01/2015
28
عنجد انك زهرة , كلمات مؤثره جدا , بارك اللة فيك وفي اهلك أحسنوا تربيتك
والله يرحموا ويصبر اهله .
طالبة بيت بيرل - 28/01/2015
29
كلمااااات مؤثرررررره وبتبكييي الحجر وكانو اللي مات اخوووو لكل حدا وعزيز عقلب كل حدا... الله يرحمك يا صهييييب وينتقم من اللي قتلك ياااااا اللللللله
ايات - 28/01/2015
30
الله يجعل مثواه الجنه وصبر اهلو
موهوبي يا بنت
بنت البلد - 28/01/2015
31
عنجد تسلم اديكي وثمك يا ورده يا هبه كل كلمه وكل حرف حرق قلبي من جواا الله يرحمو ويدخلو الجنه يا الله
موجوع - 28/01/2015
32
يا الله نشف دمي وانا بقرا ونزلن دموعي الله يرحمك يا غالي
.. - 28/01/2015
33
رحمه الله عليك يا صهيب. مثواك الجنه. انشاء الله والله ايصبر والديه على هلمصاب الله ايسلم هلايادي كلام من القلب للقلب لا شك انه كل من يقرأ الكلام الا والدمعه تسيل كل كلمه وكل سطر كان في مكانه وله معنى واثر الله يعطيك العافيه ويزيدِك من نعيمه يا احلى هبه
العمه نجاح ام عبد الله - 28/01/2015
34
אללה ירחמק ברחמתוו יא סוהייב ואללה קלמאת מוא'תריי קתייר נזלת דמוע אלעיין ואנא בקראא פיהא קל לאחתראם אלק ואללה ירחמוו ויסבר אהלוו עלה אלי סאבהם
jaljulia - 29/01/2015
35
الله يرحو وصبر اهلو ..... رائعة الله يحفظك لاهلك
ختام يتيم - 30/01/2015
36
كل الاحترام لالك،،،الله يرحمه
صفاء - 30/01/2015
37
الله هيك تكتب وليس هيك اللةالرجاء الانتبااااه
.. - 30/01/2015
38
الله يرحمك يا جاري والله انك زينه شباب كفر قاسم والله يجازي الي كان السبب ..... وشكرا يا اخت على القصيده بجت بكيت من كل قلبي لما قريتنا
جار المرحوم - 30/01/2015
39
بارك الله فيك واحسنت كلام ارق من النسيم لكنه مؤلم جدا .لا يوجد كلام في فمي لربما ارد في مناسبه اخرى .لكن اشد على يديك وجزىك الله خيرا .فانت هبه فكيف بمقالك .احسنت احسنت احسنت .العم ابو احمد .
حا تم عامر عامر - 16/02/2015
.JPG)
الاسد 
السرطان 
الجوزاء 
الثور 
القوس 
العقرب 
الميزان 
العذراء 
الحمل 
الحوت 
الدلو 
الجدي 
اضف تعقيب